पोखरा–दुबई उडानबारे प्राविधिक अध्ययन गर्दै फ्लाई दुबई

पोखरालाई सिधैं मध्यपूर्वको गन्तव्यसम्म जोड्नेगरि पोखरा–दुबई उडानको सम्भाव्यता अध्ययन गरिरहेको फ्लाई दुबईको टिमले पोखरासँगको भेटघाटलाई तिब्र बनाएको छ। फ्लाई दुबईले पोखरा अन्तर्राष्ट्रिय विमानस्थलबाट दुबईसम्म सिधा उडानको तयारी गरेको हो।

फ्लाई दुबईका जोखिम व्यवस्थापन सम्बन्धी उपाध्यक्ष एड्रियन लुकास सहितको प्राविधिक टोलीले पोखरा अन्तर्राष्ट्रिय विमानस्थलको विस्तृत स्थलगत निरीक्षण र उच्चस्तरीय छलफल गरेको हो। लुकास नेतृत्वको टोलीले पोखरा अन्तर्राष्ट्रिय विमानस्थलका महाप्रबन्धक जगन्नाथ निरौला सहित विमानस्थलको प्राविधिक टोलीसँग लामो गहन छलफल र स्थलगत निरीक्षण गरेको छ। सो क्रममा विमानस्थलको धावनमार्ग, सुरक्षा प्रणाली, प्राविधिक पूर्वाधार र उडान सञ्चालनका विविध पक्षको सूक्ष्म अध्ययन गरेको टोलीले बताएको छ।