एआईको नजरमा विश्वकप फाइनल: स्पेन कि अर्जेन्टिना, कसले मार्ला बाजी ?

काठमाडौं । फुटबलको यो सबैभन्दा ठुलो महाकुम्भको विजेता अनुमान गर्नु कहिल्यै सहज हुँदैन । सन् १९५४ को फाइनलमा बलियो मानिएको हंगेरीलाई पश्चिम जर्मनीले हराएको खेलदेखि लिएर यस वर्षको प्रतियोगितामा सेमिफाइनलबाटै फ्रान्स बाहिरिएको घटनासम्मलाई हेर्दा, फुटबलको खेलमा पूर्वअनुमान वा निश्चितता भन्ने कुरा भ्रम मात्र हो ।

यसको अनिश्चितताले खेल विश्लेषकका बलिया पूर्वानुमानलाई पनि फगत एउटा अनुमानमा सीमित गरिदिन्छ । आइतबार न्यु जर्सीको मेटलाइफ स्टेडियममा हुने फाइनल खेलमा डिफेन्डिङ च्याम्पियन अर्जेन्टिनालाई हराउँदै युवा खेलाडी लामिन यामाल सम्मिलित स्पेनले उपाधि जित्नेमा केही विश्लेषकहरू बढी विश्वस्त देखिन्छन् । अर्कोतर्फ, लियोनेल मेस्सीले आफ्नो खेल जीवनको अन्त्यतिर अर्जेन्टिनालाई लगातार दोस्रो पटक उपाधि दिलाउँदै ‘गोल्डेन बुट’ समेत जित्ने अनुमान गर्ने प्रशंसक पनि उत्तिकै छन् ।