मासु खाएपछि बिहान रक्तचाप किन बढ्छ? मुटुरोग विशेषज्ञ डा. ओम मूर्ति अनिलले बताए मुख्य कारण

मासुको परिकार खाएपछि बिहानै रक्तचाप बढ्ने समस्याको प्रमुख कारण मासुमा प्रयोग गरिने अत्यधिक नुन र मसला रहेको मुटुरोग विशेषज्ञ डा. ओम मूर्ति अनिलको ठम्याइ छ। रातो मासुमा सोडियम र चिल्लोको मात्रा बढी हुने भएकाले यसले मुटुको धमनीमा सीधा प्रभाव पार्छ। त्यसैले खसी वा राँगाको मासुको सट्टा माछा वा कुखुराको मासु ठिक्क मात्रामा प्रयोग गर्नु र पकाउँदा नुनको मात्रामा विशेष ध्यान दिनु स्वास्थ्यका लागि फाइदाजनक हुन्छ।

हाम्रो दैनिक भान्छामा प्रयोग हुने नुन भन्दा पनि प्याकेटका खानेकुरामा हुने 'लुकेको नुन' मुटुका लागि निकै घातक साबित हुन्छ। बाहिरका तयारी खानेकुरा जस्तै म:म, चाउमिन, चिप्स र बट्टाका अचारमा शरीरलाई चाहिने भन्दा निकै बढी सोडियम मिसाइएको हुन्छ, जसले रक्तचापलाई अनियन्त्रित बनाउँछ। डाक्टरका अनुसार सलादमा नुन छर्कने वा खानामा माथिबाट नुन थपेर खाने बानीले मुटुलाई थप जोखिममा पार्ने भएकाले यस्ता बानीमा सुधार ल्याउनु निकै जरुरी छ।