कर वृद्धि लागू हुनुअघि घरजग्गा कारोबारमा उछाल, असारमा राजस्व संकलनले तोड्यो कीर्तिमानी

काठमाडौँ । सरकारले नयाँ आर्थिक वर्षदेखि पूँजीगत लाभकरको दर बढाउने घोषणा गरेपछि घरजग्गा कारोबारमा असार महिनाभर उल्लेखनीय चहलपहल देखिएको छ। कर वृद्धि लागू हुनुअघि नै कारोबार टुङ्ग्याउन चाहनेहरूको भीड बढ्दा घरजग्गा क्षेत्रबाट उठेको राजस्वले नयाँ ऐतिहासिक रेकर्ड कायम गरेको हो।

भूमि व्यवस्थापन तथा अभिलेख विभागका तथ्यांकअनुसार आर्थिक वर्ष २०८२/०८३ को असार महिनामा मात्रै घरजग्गा कारोबारबाट ११ अर्ब ९४ करोड रुपैयाँ राजस्व संकलन भएको छ। यो हालसम्म कुनै पनि एक महिनामा यस क्षेत्रबाट उठेको सबैभन्दा ठूलो रकम हो। यसअघि आर्थिक वर्ष २०७७/०७८ को चैतमा ८ अर्ब ५९ करोड रुपैयाँ राजस्व संकलन भएको थियो ।