गुल्मी नेपालको कफी राजधानी बन्ने संकेत

गुल्मी । नेपालमा कफी खेतीको इतिहाससँग जोडिएको जिल्ला गुल्मीमा पछिल्लो समय व्यावसायिक कफी खेती विस्तार गर्ने अभियानले नयाँ गति लिएको छ । नेपालमा कफीको उद्गमस्थलका रूपमा परिचित मुसिकोट नगरपालिका–५, आँपचौरमा युवा कृषक श्रीधर पाण्डेले ठूलो परिमाणमा कफी खेती विस्तार गर्दै जिल्लाको कृषि क्षेत्रमा नयाँ आशा जगाएका छन् ।

आँपचौरस्थित आँपचौर कफी एन्ड एग्रो रिसर्च प्रालिमार्फत विगत दुई वर्षदेखि व्यावसायिक कफी खेती गर्दै आएका पाण्डेले हालसम्म करिब ५ सय रोपनी क्षेत्रफलमा कफीका बिरुवा रोपिसकेका छन् । उनले यस वर्ष मात्रै ६० हजार कफीका बिरुवा उत्पादन गरेका छन् भने आगामी वर्ष डेढ लाखभन्दा बढी बिरुवा उत्पादन गर्ने लक्ष्य लिएका छन् ।