विद्युत आयोजनाको आरसीओडी थप्ने तयारी

काठमाडौं ।

नेपाल विद्युत् प्राधिकरणले विद्युत् खरिद–बिक्री सम्झौता (पीपीए) सम्पन्न भई निर्माणका विभिन्न चरणमा रहेका तर निर्धारित समयमा व्यावसायिक उत्पादन सुरु गर्न नसकेका जलविद्युत् आयोजनाको व्यावसायिक रुपमा विद्युत उत्पादन गरिसक्नुपर्ने निर्धारित अन्तिम मिति (आरसीओडी) म्याद थप्ने प्रक्रिया अघि बढाएको छ । यसका लागि आयोजनाको प्रगति र दायित्व पूरा गरेको अवस्थाका आधारमा चार समूहमा वर्गीकरण गर्ने तयारी भएको छ । असार ३२ गते बसेको नेपाल विद्युत् प्राधिकरण सञ्चालक समितिको बैठकले आयोजनाको भौतिक प्रगति, आरसीओडीको अवस्था तथा पीपीएमा उल्लेखित विभिन्न दायित्वको कार्यान्वयनलाई आधार मानेर आयोजनालाई समूह ‘क’, ‘ख’, ‘ग’ र ‘घ’ मा वर्गीकरण गर्ने निर्णय गरेको हो ।