बेमौसमी वर्षाले घटायो चितवनको मह उत्पादन

चितवनमा यस वर्ष मह उत्पादन घटेको छ। बेमौसमी वर्षा, बढ्दो चिसो र मौरीका लागि आवश्यक चरन क्षेत्रको अभावका कारण अघिल्ला वर्षको तुलनामा मह उत्पादनमा कमी आएको हो। घारको संख्या बढ्दै गए पनि उत्पादन भने निरन्तर ओरालो लागेको मौरीपालक किसानको अनुभव छ।

रत्ननगर नगरपालिका–४ स्थित सिर्जना टोलका मौरीपालक किसान सूर्य मानन्धरले २०५२ सालदेखि मौरीपालन गर्दै आएका छन्। हाल उनीसँग २०० गोला मौरी छन्। अघिल्ला वर्षहरूमा प्रतिगोला ३० देखि ३२ केजीसम्म मह उत्पादन हुने गरेकोमा यस वर्ष प्रतिगोला औसत २२ केजी मात्र उत्पादन भएको उनले बताए।