'हामीले सरकार ढालेको होइन, अल्पमतमा परेपछि विकल्प मात्र दिएका हौँ'

सुर्खेत । कर्णालीमा बुधबार सत्ता साझेदार दल नेपाली कांग्रेसले आफ्नो दलबाट सरकारमा सहभागी मन्त्रीहरूलाई फिर्ता बोलायो । समर्थन कायमै राखेको अवस्थामा एक्कासि बिहीबार प्रमुख प्रतिपक्ष दल नेपाली कम्युनिस्ट पार्टी (नेकपा)लाई मनाएर मुख्यमन्त्री यामलाल कँडेलविरुद्ध अविश्वासको प्रस्ताव ल्यायो ।

कांग्रेस संसदीय दलका नेता जीवनबहादुर शाहीलाई मुख्यमन्त्रीमा प्रस्ताव गर्दै १६ सांसदले हस्ताक्षर गरेका छन् । एमाले संसदीय दलका नेतासमेत रहेका मुख्यमन्त्री यामलाल कँडेल भने तत्कालीन एमाले–कांग्रेसबिच केन्द्रमै गठबन्धन बनेकाले माथिबाटै निर्णय आउने आशामा थिए । तर कांग्रेसले एमालेसँग गठबन्धन टुटेको जानकारीसहित नेकपासँग सम्बन्ध स्थापित गर्‍यो । तर नेकपाभित्र अहिले सत्तामा जाने/नजाने भन्ने विषयले विवाद उत्पन्न गराएको छ ।