सुदूरपश्चिममा मुख्यमन्त्री हटाउने योजनाबाट कांग्रेसको असन्तुष्ट पक्ष ब्याक, मन्त्रीमा भागबन्डा

झन्डै दुई सातादेखि सुदूरपश्चिम प्रदेश कांग्रेसभित्र चर्किएको शक्ति संघर्ष अन्ततः मुख्यमन्त्री परिवर्तन नभइ मन्त्रीमण्डल पुनर्गठनमा मोडिएको छ । दलको नेताबाट हटाउने अभियानबाट असन्तुष्ट पक्ष ब्याक भएपछि मुख्यमन्त्री कमलबहादुर शाह पद जोगाउन सफल भएका छन् भने सरकारमा रहेका कांग्रेसका मन्त्री र राज्यमन्त्री भने फेरिने भएका छन् ।

शनिबार साँझ भएको छलफलपछि कांग्रेसभित्र शक्ति सन्तुलन मिलाउने सहमति जुटेको हो । दलभित्रको असन्तुष्ट समूहलाई सरकारमा दुई मन्त्री र एक राज्यमन्त्री दिने तथा शाह पक्षले एक मन्त्री र एक राज्यमन्त्री पाउने गरी भागबन्डा मिलाइएको स्रोतको दाबी छ । यससँगै सरकारभित्र कांग्रेसको प्रतिनिधित्व गर्ने कम्तीमा पनि दुई मन्त्री र एक राज्यमन्त्री फिर्ता हुने छन् । कांग्रेसका तीनै मन्त्री र दुबै राज्यमन्त्री फेरिने सम्भावना पनि रहेको एक प्रदेशसभा सदस्यले बताए । तर, मुख्यमन्त्री शाह पक्ष आर्थिक मामिलामन्त्री बहादुर थापालाई कायम राख्ने रणनीतिमा छ । असन्तुष्ट पक्षको नेतृत्व गरिरहेका दिवानसिंह बिष्ट समूहले भने अर्थमा पनि दाबी गरिरहेको छ । कांग्रेसबाट हाल सरकारमा आर्थिक मामिलामन्त्री थापा, सामाजिक विकासमन्त्री मेघराज खड्का, उद्योग, पर्यटन, वन तथा वातावरणमन्त्री शिवराज भट्ट, सामाजिक विकास राज्यमन्त्री सरस्वती खड्का तथा आर्थिक मामिला राज्यमन्त्री प्रकाशबहादुर बम छन् । मुख्यमन्त्रीविरुद्ध सुरु भएको अभियानले गत साता नाटकीय मोड लिएको थियो । १७ सदस्यीय (विदेशमा रहेका एकबाहेक) कांग्रेस संसदीय दलमध्ये नौ जना सांसदले शाहलाई दलको नेताबाट हटाउन हस्ताक्षर गरेका थिए । तर, प्रदेशसभा सदस्य डम्मरी महरा रक्षाले अन्तिम समयमा हस्ताक्षर फिर्ता लिएपछि मुख्यमन्त्री हटाउने अभियान कमजोर बनेको थियो । विवाद थप चर्किन नदिन कांग्रेस केन्द्रले हस्तक्षेप गर्दै सहमहामन्त्री उदयशम्शेर राणा र केन्द्रीय सदस्य राजन केसीलाई धनगढी पठाएको छ ।