तिलोत्तमा र पाल्पा बल्ड्याङ्गदी क्षेत्रमा भारी वर्षा: सतर्कता अपनाउन विभागको अनुरोध

काठमाडौँ । जल तथा मौसम विज्ञान विभागले रूपन्देहीको तिलोत्तमा र पाल्पाको बल्ड्याङ्गदी वर्षामापन केन्द्र तथा आसपासका क्षेत्रमा मध्यमदेखि भारी वर्षा भएको जनाउँदै स्थानीय बासिन्दालाई उच्च सतर्कता अपनाउन अनुरोध गरेको छ । सोमबार बिहान १२ः५० बजे सूचना जारी गर्दै विभागले पछिल्लो तीन घण्टामा ती क्षेत्रहरूमा निरन्तर वर्षा भइरहेको जानकारी दिएको हो ।

भारी वर्षाका कारण सो क्षेत्र भएर बहने स–साना खोलाहरूमा आकस्मिक रूपमा पानीको बहाव बढ्न सक्ने चेतावनी दिइएको छ । विभागले नदी तटीय क्षेत्र र डुबानको जोखिममा रहने होचा भू–भागका बासिन्दाहरूलाई विशेष सावधानी अपनाउन अपिल गरेको छ । आकस्मिक बाढी र डुबानको सम्भावनालाई मध्यनजर गर्दै तटीय क्षेत्रमा बसोबास गर्नेहरूलाई सुरक्षित रहन र जलस्तरको सामान्य अवस्थामा पनि निरन्तर निगरानी राख्न विभागले ध्यानाकर्षण गराएको छ ।