भारतले सञ्चालनमा ल्यायो हाइड्रोजन रेल

काठमाडौं । भारतले ‘हाइड्रोजन रेल’ सञ्चालनमा ल्याएको छ। प्रधानमन्त्री नरेन्द्र मोदीले शुक्रबार जिन्द रेलवे स्टेसनबाट पहिलो ‘हाइड्रोजन रेल’ को उद्घाटन गरेका छन्। उक्त रेलको नाम ‘नमो ग्रिन रेल’ राखिएको छ।

उक्त रेल हरियाणाको ‘जिन्द–सोनीपत’ ८९ किलोमिटर रेलमार्गमा सञ्चालन हुनेछ। यसका लागि न्यूनतम भाडा भारु ५ र अधिकतम भारु २५ तोकिएको छ। उक्त रेलमार्गमा जिन्द, गोहाना र सोनीपतसहित विभिन्न स्टेसन तथा हल्टमा सेवा दिनेछ। उक्त रेललाई भारतको स्वच्छ, दिगो र हरित रेल यातायाततर्फको ऐतिहासिक उपलब्धि बताइएको छ। विश्वका प्रायः हाइड्रोजन रेल दुईदेखि तीन कोचमा सीमित रहेका बेला भारतले भने १० कोचको रेल सञ्चालनमा ल्याएको हो।