सधैं जोखिममा नारायणगढ-मुग्लिन खण्ड

चितवन जिल्ला प्रशासन कार्यालयले शनिबार र आइतबार राति १० बजेदिखि नारायणगढ–मुग्लिन सडकखण्ड र राजधानी प्रवेश गर्ने पृथ्वी राजमार्गमा गाडी चलााउन रोक लगायो। भारी वर्षाको पूर्वानुमानपछि बढी दुर्घटना हुन सक्ने क्षेत्रमा रातिमा सवारी चलाउन रोक लगाइएको हो। बर्खा लागेसँगै चितवन हुँदै राजधानी प्रवेश गर्ने सडक पहिरोको उच्च जोखिममा छन्।

जिल्ला ट्राफिक प्रहरी कार्यालय चितवनको तथ्यांकअनुसार गत असोजयता नारायणगढ–मुग्लिन खण्ड पहिरोका काराण १७ पटकसम्म अवरुद्ध भएको छ। यस अवधिमा ३३१ घण्टा सडक अवरुद्ध भएको ट्राफिक प्रहरी कार्यालय चितवनका प्रमुख प्रहरी निरीक्षक अनिल थापाले जानकारी दिए। ‘चितवन भएर राजधानी जाने सडक ज्यादै जोखिममा छन्। नारायणगढ–मुग्लिन खण्ड र चितवनमा पर्ने पृथ्वी राजमार्गमा १० महिनामा सडक अवरुद्ध हुने गरी १७ पटक पहिरो खसेको छ,’ उनले भने, ‘सवारी दुर्घटनाका कारण सडक अवरुद्ध त धेरै पटक हुन्छ।’