धितोपत्र बोर्डको मार्गचित्र : एआईबाट शेयर बजार निगरानीदेखि 'डिजिटल क्यापिटल मार्केट २.०' सम्म

काठमाडौं । नेपाल धितोपत्र बोर्ड (सेबोन) ले पुँजी बजारको नियमन, अनुसन्धान र विकासका लागि आर्टिफिसियल इन्टेलिजेन्स (एआई) को व्यापक प्रयोग गर्ने योजना अघि सारेको छ । बोर्डले हालै सार्वजनिक गरेको 'नेपालको पुँजी बजार विकास मार्गचित्र, २०८३' मा शेयर बजार सुधारका कार्यसूची प्रस्तुत गर्दै बजार निगरनी, धोखाधडी नियन्त्रण, तथा जोखिम विश्लेषण स्वचालित बनाउन एआईको प्रयोग गर्न सकिने क्षेत्रहरूको पहिचान गरेको छ ।

बोर्डले विश्वका प्रमुख धितोपत्र नियामक संस्थाको अभ्यासलाई पछ्याउँदै बजार नियमनका विभिन्न क्षेत्रहरू एआईमार्फत स्वचालित बनाउने लक्ष्य लिएको हो । मार्गचित्रअनुसार एआईको प्रयोग गरी अस्वाभाविक कारोबार (Unusual Trading Patterns), इनसाइडर ट्रेडिङ तथा बजार चलखेल (Market Manipulation) पहिचान गर्न सक्ने मार्केट सर्भेलेन्स प्रणाली विकास रहेको उल्लेख गरेको छ ।