विराटनगर आइपुग्यो कार्गो रेल

विराटनगर। भारतको कोलकाता बन्दरगाहबाट रेलमार्फत ल्याइएको पहिलो कार्गो सोमबार विराटनगरस्थित नेपाल भन्सार यार्डमा आइपुगेको छ। यससँगै तेस्रो मुलुकबाट आयात हुने मालसामानको रेल ढुवानी सेवा पहिलोपटक विराटनगरसम्म विस्तार भएको हो। जसले पूर्वी नेपालका उद्योगी तथा आयातकर्तालाई ढुवानी लागत र समय दुवै घटाउने अपेक्षा गरिएको छ।

कोलकाताबाट प्रस्थान गरेको रेलले नेपालको स्वस्तिक आयल इन्डस्ट्रिजका लागि तेस्रो मुलुकबाट आयात गरिएको कच्चा पदार्थ बोकेका ४० वटा कन्टेनर विराटनगर ल्याएको हो। मर्सक लाइनका ती कन्टेनरमा ढुवानीको सुरक्षा सुनिश्चित गर्न इलेक्ट्रोनिक कार्गो ट्र्याकिङ सिस्टम (ईसीटीएस) जडान गरिएको छ।