सचिव बैठकका २२ निर्णय : बिचौलियामुक्त सेवा र सार्वजनिक बिदा पुनरावलोकन हुने

काठमाडौँ- नेपाल सरकारका मुख्यसचिव गोविन्दबहादुर कार्कीको अध्यक्षतामा सोमबार बसेको सचिव बैठकले सुशासन, सेवा प्रवाह सुधार, प्रशासनिक दक्षता, आर्थिक अनुशासन तथा सार्वजनिक सेवा प्रभावकारी बनाउन २२ बुँदे निर्णय गरेको छ। बैठकले मन्त्रालय तथा निकायलाई निर्णयको प्रभावकारी कार्यान्वयन गर्न निर्देशन दिएको हो।

बैठकले सरकारी सुधारसम्बन्धी एकीकृत कार्यसूचीअन्तर्गत भएका असल अभ्यासलाई निरन्तरता दिने, कार्यदल तथा समितिबाट प्राप्त सुझाव कार्यान्वयन गर्ने र मन्त्रालयहरूले बाँकी रहेका सुधारका कामको नियमित अनुगमन गर्ने निर्णय गरेको छ। बिजनेस प्रोसेस रिइन्जिनियरिङ (बीपीआर) मार्फत अनावश्यक प्रक्रिया, कागजात र तह हटाई निर्णय प्रक्रिया छिटो, सरल र नागरिकमैत्री बनाइने भएको छ।