ताप्लेजुङका दुई पालिकाका नयाँ नीति : सिरिजङ्गामा कडाइ, फक्ताङलुङमा भाषा संरक्षणमा जोड

ताप्लेजुङका सिरिजङ्गा र फक्ताङलुङ गाउँपालिकाले चालु आर्थिक वर्ष २०८३/८४ का लागि विभिन्न नीति तथा कार्यक्रम सार्वजनिक गरेका छन्। सिरिजङ्गाले आर्थिक अनुशासन, वातावरण संरक्षण र गैरकानुनी गतिविधि नियन्त्रणमा कडाइ गर्ने नीति लिएको छ भने फक्ताङलुङले सामाजिक सुरक्षा, स्वास्थ्य, शिक्षा र स्थानीय भाषा संरक्षणलाई प्राथमिकतामा राखेको छ।

सिरिजङ्गा गाउँपालिकाले स्वीकृत गरेको आर्थिक विधेयकमार्फत पालिकामा दर्ता नगरी व्यवसाय सञ्चालन गर्ने, पसलमा मूल्य सूची नराख्ने, म्याद गुज्रिएका सामग्री बिक्री गर्ने लगायतका कार्यमा जरिवानाको व्यवस्था गरेको छ। दर्ता नगरी व्यवसाय सञ्चालन गर्ने र मूल्य सूची नराख्ने व्यवसायीलाई एक–एक हजार रुपैयाँ जरिवाना गरिनेछ भने म्याद गुज्रिएका सामग्री बिक्री गर्ने व्यवसायीलाई पहिलो पटक तीन हजार रुपैयाँ जरिवाना गरिनेछ।