डिभिजन वन कार्यालयको गाडीको ठक्करबाट महिलाको मृत्यु

झापा : झापामा डिभिजन वन कार्यालयको गाडीको ठक्करबाट सिटी सफारीमा सवार एक महिलाको मृत्यु भएको छ। मृत्यु हुनेमा मेचीनगर नगरपालिका १५ निवासी ४० वर्षीया आरती उराउ रहेको जिल्ला प्रहरी कार्यालय झापाले जनाएको छ।

प्रहरीका अनुसार आज बिहान १०:४५ बजे मेचीनगर १५ कालिकास्थित भित्री सडक खण्डमा काँकडभिट्टाबाट भद्रपुरतर्फ जाँदै गरेको प्र १–०१–००२ ह ७८०५ नम्बरको सिटी सफारी र विपरीत दिशाबाट आउँदै गरेको डिभिजन वन कार्यालय झापाको बागमती प्र ०१–००२ झ ७३६० नम्बरको स्कोरपियो गाडीसँग ठोकिँदा दुर्घटना भएको थियो। दुर्घटनामा सिटी सफारीमा सवार महिला उराउ गम्भीर घाइते भएकी थिइन्। उनलाई उपचारको लागि प्रादेशिक अस्पताल भद्रपुर पठाएकोमा बिहान ११:१५ बजे चिकित्सकले चेकजाँच गर्दा मृत्यु भइसकेको थियो।