चट्टानी घर्तीभीर फोरियो, खोटाङ–तराई बाटो छोटियो

खोटाङ । खोटाङको हलेसी तुवाचुङ नगरपालिका–११ राजापानीस्थित चर्चित घर्तीभीर (महभीर) फोडेर सडक निर्माण सम्पन्न भएको छ । आहाले–रेग्मीटार सडक खण्ड अन्तर्गत साप्सु खोला किनारमा रहेको उक्त चट्टानी भीर वर्षौँदेखि सडक विस्तारको मुख्य अवरोध बनेको थियो ।

निर्माण कम्पनी कमल कन्स्ट्रक्सन एण्ड सप्लायर्स उदयपुरले झन्डै पाँच महिनाको समय खर्चेर चट्टान काटी सडक निकालेको हो । जोखिमपूर्ण भूगोलमा निरन्तर खनिंदै आएको उक्त चट्टानीभीर असार ११ गते अन्ततः छिचोलिएको थियो । भौतिक पूर्वाधार विकास कार्यालय खोटाङमार्फत १ करोड ७ लाख ७८ हजार रुपैयाँ लगानीमा सडक स्तरोन्नतीको ठेक्का सम्झौता २०८२ माघ ११ गते भएको थियो, जसको म्याद गत जेठ ३१ गते नै सकिएको थियो ।