सरकारी कार्यालयहरूमा नयाँ दरबन्दी सिर्जनामा कडाइ

काठमाडौं । सरकारले चालु आर्थिक वर्षमा कर्मचारी व्यवस्थापनलाई थप व्यवस्थित र खर्च नियन्त्रणमुखी बनाउने उद्देश्यका साथ सरकारी कार्यालयहरूमा नयाँ दरबन्दी सिर्जनामा कडाइ गरेको छ। अब प्रधानमन्त्री तथा मन्त्रिपरिषद्को कार्यालयको पूर्वस्वीकृतिबिना कुनै पनि सरकारी निकायले नयाँ कर्मचारीको दरबन्दी थप गर्न पाउने छैन।

मुख्यसचिव गोविन्दबहादुर कार्कीको अध्यक्षतामा बसेको बैठकले यस्तो निर्णय गरेको हो। बैठकबाट पारित २२ बुँदे निर्णयअनुसार सरकारी निकायहरूले आवश्यकताका आधारमा पनि प्रधानमन्त्री कार्यालयको अनुमति नलिई नयाँ दरबन्दी सिर्जना गर्न सक्ने छैनन्।