कुलत धान्न चोरीको सहारा

जनकपुरधाम। घर खाली भएको सुइँको पाएर भित्र पस्ने, मठमन्दिरका दानपेटिका फुटाउने अनि हात लागेका मोबाइल, भाँडाकुँडा वा अन्य सामान सस्तोमै कवाडी पसलमा बेच्ने। प्रहरीका अनुसार मधेसका विभिन्न जिल्लामा हुने यस्ता कतिपय चोरीमा लागुऔषध किन्न तत्काल पैसा जुटाउने उद्देश्य देखिएको छ।

सबै चोरीका घटना लागुऔषधसँग जोडिएका हुँदैनन्। तर, चोरीमा पक्राउ परेका कतिपय किशोर तथा युवाको पृष्ठभूमि बुझ्दा उनीहरू नियमित लागुऔषध प्रयोगकर्ता रहेको पाइएको प्रहरी अधिकारीहरू बताउँछन्। जिल्ला प्रहरी कार्यालय धनुषाका प्रवक्ता प्रहरी नायब उपरीक्षक मधुसूदन न्यौपाने भन्छन्, “चोरीका घटनामा पक्राउ परेकामध्ये धेरै जना लागुऔषध प्रयोगकर्ता पनि भएको पाइएको छ।”