शिक्षकले भन्थे, ‘उत्तरपुस्तिका मसँग छ कति नम्बर चाहिन्छ ? त्यसको बदला फोटो पठाऊ’

विराटनगर । ‘राति साढे १०–११ बजेतिर लगातार फोन आउँथ्यो । फोन उठाउँदा शिक्षकले भन्थे– तिम्रो परीक्षाको उत्तरपुस्तिका मसँगै छ, भन तिमीलाई कति नम्बर चाहिन्छ ? मलाई आफ्ना ५० वटा जति फोटो पठाऊ र भिडियो कल उठाऊ ।’

मोरङको सुन्दरहरैँचास्थित सुकुना माध्यमिक विद्यालयकी एक भूतपूर्व छात्राले विगतमा भोगेको यो अनुभव अहिले सामाजिक सञ्जाल हुँदै अनुसन्धानको घेरामा पुगेको छ । कक्षा ११ मा अध्ययनरत रहँदा परीक्षामा नम्बर थपिदिने प्रलोभन देखाएर शिक्षकबाट अश्लील र अमर्यादित मागहरू गरिएको सो घटना वर्षौंसम्म डर र लोकलाजका कारण दबेर रहेको थियो ।