मार्भेल ब्रान्डको नाम र लोगो दुरुपयोग गरेको आरोपमा व्यवसायी पक्राउ, ९ जनामाथि अनुसन्धान

सिरहा । सिरहाको गोलबजार नगरपालिका–४ स्थित नेहाल आइरन स्टोरबाट चर्चित मार्भेल ब्रान्डको नाम र लोगो दुरुपयोग गरी बोरवेल पाइप बिक्री गरेको आरोपमा एक व्यवसायीलाई प्रहरीले पक्राउ गरेको छ । घटनामा संलग्न रहेको आशंकामा थप नौ जनामाथि अनुसन्धान अघि बढाइएको प्रहरीले जनाएको छ ।

जिल्ला प्रहरी कार्यालय सिरहाका अनुसार शनिबार दिउँसो करिब १:३० बजे प्राप्त विशेष सूचनाका आधारमा इलाका प्रहरी कार्यालय गोलबजारबाट खटिएको टोलीले सिरहा नगरपालिका–२० लकडीगोठ निवासी ४५ वर्षीय महम्मद साबिर खोनले सञ्चालन गरेको नेहाल आइरन स्टोरमा खानतलासी गरेको थियो ।