गौरसहित दर्जनौं गाउँ डुबानको जोखिममा

वर्षायाम सुरु भएसँगै रौतहट–सर्लाहीको बागमती नदी पूर्वी तटबन्धको संयुक्त अनुगमन गरी जोखिमयुक्त स्थानमा तत्काल मर्मत गर्ने निर्णय भएको छ। तर नेपाल–भारत सीमाक्षेत्रमा भारतीय पक्षले बैरगनियास्थित रहेको बाँध मर्मतका नाममा एकतर्फी रूपमा माटो थप्न थालेपछि रौतहट सदरमुकाम गौरसहित दर्जन गाउँ डुबानमा पर्ने खतरा बढेको छ।

रौतहट र सर्लाहीका प्रमुख जिल्ला अधिकारी, नेपाल प्रहरी, सशस्त्र प्रहरी बल, नेपाली सेना तथा सिँचाइ तथा नदी व्यवस्थापन कार्यालयका डिभिजनलसहितको प्राविधिक टोलीले बागमतीको पूर्वी तटबन्धको संयुक्त अनुगमन गरेको हो। टोलीले कटानको उच्च जोखिम रहेका स्थान पहिचान गर्दै तत्काल मर्मत तथा सुदृढीकरणको काम अघि बढाउने बताए।