अर्को साताबाट नागढुंगा सुरुङमार्ग सञ्चालन गरिने

एक वर्ष अघि नै निर्माण पूरा भइसकेको तर विभिन्न कारणले सञ्चालन हुन नसकेको नागढुंगा सुरुङमार्ग साउन दोस्रो सातादेखि क्रमिक रूपमा सञ्चालन गर्ने तयारी गरिएको छ।

साउन १ गते सुरुङमार्गको विधिवत उद्घाटन गर्ने कार्यक्रम तय गरिएको सडक विभागका महानिर्देशक डा. विजय जैशीले बताएका छन्। उनका अनुसार सो उद्घाटन कार्यक्रममा जापानी सहयोग नियोग (जाइका) का प्रमुख सहभागी हुने टुंगो लागेको छ। ‘उद्घाटन भने प्रधानमन्त्री वा मन्त्री कसबाट गर्ने भन्ने विषयमा टुंगिएको छैन, त्यसबारे कुराकानी भइरहेको छ’, उनले भने।