प्रधानमन्त्रीको सन्देशले सेयर बजारमा हरियाली

प्रधानमन्त्री बालेन्द्र शाहले पुँजी बजारसँग सम्बन्धित सरोकारवालासँग प्रत्यक्ष संवाद गरेपछि सोमबार नेपाल स्टक एक्सचेन्ज (नेप्से) मा देखिएको सुधारलाई लगानीकर्ताले सकारात्मक संकेतका रूपमा लिएका छन्। केही समययता निरन्तर दबाबमा रहेको बजार प्रधानमन्त्रीको भेटवार्ता र सरकारको नीतिगत प्रतिबद्धतापछि दोहोरो अंकले उकालो लागेको छ। यद्यपि बजार विश्लेषकहरू भने सकारात्मक अभिव्यक्तिभन्दा पनि त्यसको कार्यान्वयन नै दीर्घकालीन सुधारको आधार हुने बताउँछन्।

प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार भएको छलफलमा प्रधानमन्त्री शाहले वर्तमान सरकारले आर्थिक विकास र समृद्धिका लागि पुँजी बजारलाई विशेष प्राथमिकता दिएको बताए। पुँजी बजारलाई उद्यमशीलता, उत्पादन र रोजगारी सिर्जनाको प्रमुख माध्यमका रूपमा विकास गर्ने सरकारको उद्देश्य रहेको बताए। उनले व्यवसायी तथा लगानीकर्तालाई उच्च मनोबलका साथ काम गर्न आग्रह गर्दै नेपालको पुँजी बजारलाई व्यावसायिक, पारदर्शी र मर्यादित बनाउनुपर्नेमा जोड दिए।