चौतर्फी विरोधपछि शिक्षा र स्वास्थ्यमा ३ प्रतिशत समता शुल्क हटाउने सरकारको निर्णय

काठमाडौं- चौतर्फी विरोधपछि सरकारले निजी शिक्षा तथा स्वास्थ्य क्षेत्रमा लागू गर्ने निर्णय गरेको ३ प्रतिशत समता शुल्क तत्काल कार्यान्वयन नगर्ने निर्णय गरेको छ। यससँगै निजी विद्यालयका अभिभावक र निजी अस्पतालका सेवाग्राहीमाथि थप शुल्कको भार पर्ने अवस्था टरेको छ।

सरकारले आर्थिक विधेयक, २०८३ मार्फत निजी स्वास्थ्य संस्था र निजी शैक्षिक संस्थाबाट प्रदान हुने सेवामा क्रमशः ‘स्वास्थ्य समता शुल्क’ र ‘शिक्षा समता शुल्क’ शीर्षकमा ३ प्रतिशत अतिरिक्त शुल्क उठाउने व्यवस्था गरेको थियो। उक्त निर्णय सार्वजनिक भएसँगै बिरामी, अभिभावक, निजी क्षेत्र तथा विभिन्न सरोकारवाला निकायले यसको विरोध गरेका थिए।