लाइसेन्स मात्रै होल्ड गर्ने आईएसपी नियन्त्रणमा प्राधिकरण असफल, ८२ कम्पनीको बजार हिस्सा ०.४८% मात्रै ?

काठमाडौं । नेपालको दूरसञ्चार र इन्टरनेट क्षेत्र बाहिरबाट हेर्दा जति आकर्षक देखिन्छ, यसको भित्री पाटो भने नीतिगत विचलन र कमजोर नियमनका कारण त्यति नै अस्तव्यस्त छ । देशव्यापी रूपमा ब्रोडब्यान्ड सेवाको पहुँच तीव्र गतिमा विस्तार भइरहेको दाबी गरिए पनि, सेवा प्रदान नगरी केवल लाइसेन्स मात्र ओगटेर बस्ने ‘झोले’ इन्टरनेट सेवा प्रदायक (आईएसपी) हरूलाई तह लगाउन नियामक नेपाल दूरसञ्चार प्राधिकरण नराम्रोसँग असफल देखिएको छ ।

नेपाल दूरसञ्चार प्राधिकरणले हालै सार्वजनिक गरेको दूरसञ्चार सूचक प्रतिवेदनले नेपाली इन्टरनेट बजारको एउटा गम्भीर विरोधाभासपूर्ण र अस्वस्थ चित्र स्पष्ट देखाउँछ । प्राधिकरणको तथ्याङ्क अनुसार नेपालमा इन्टरनेट सेवा सञ्चालनका लागि हाल कूल १०२ वटा कम्पनीलाई लाइसेन्स दिइएको छ । तर, तीमध्ये जम्मा २० वटा कम्पनीले सिङ्गो बजारको ९९ प्रतिशतभन्दा बढी हिस्सा कब्जा गरेका छन् भने बाँकी ८२ वटा कम्पनीहरू लाइसेन्स होल्ड गरेर बसेका छन् ।