झापामा ७७ प्रतिशत रोपाइँ

भद्रपुर। झापामा हालसम्म ७७ प्रतिशत रोपाइँ सम्पन्न भएको छ। कृषि ज्ञान केन्द्र झापाका अनुसार ४ साउनसम्म जिल्लामा कुल ७७ प्रतिशत क्षेत्रफलमा धान रोपाइँ सकिएको हो।

कृषि ज्ञान केन्द्र झापाका प्रमुख सागर विष्टका अनुसार गत वर्षको यही अवधिको तुलनामा यस वर्ष करिब ११ प्रतिशत बढी क्षेत्रमा धान रोपाइँ भएको छ। सुरुमा पर्याप्त वर्षा नहुँदा रोपाइँ प्रभावित भए पनि असारको दोस्रो सातादेखि निरन्तर वर्षा भएपछि किसान धमाधम रोपाइँमा जुटेका छन्।