कुखुरामा बर्डफ्लु र एच-९ प्रकोप: चार अर्बको क्षति, उत्पादन चक्र प्रभावित

मुलुकका ११ जिल्लामा फैलिएको बर्डफ्लु (एभियन इन्फ्लुएन्जा) र विभिन्न जिल्लामा देखिएको एच–९ इन्फ्लुएन्जा संक्रमणका कारण नेपालको पोल्ट्री क्षेत्रमा करिब चार अर्ब रुपैयाँ बराबरको आर्थिक क्षति पुगेको कुखुरा व्यवसायीले दाबी गरेका छन्। संक्रमणका कारण लाखौं कुखुरा नष्ट हुनुका साथै उत्पादन चक्र नै प्रभावित भई दीर्घकालीन असर पर्ने भएकाले किसानलाई अर्बौं क्षति पुगेको दाबी उनीहरूले गरेका हुन् ।

बर्डफ्लु संक्रमण मोरङ, झापा, सुनसरी, महोत्तरी, बारा, चितवन, नवलपरासी, काठमाडौं, भक्तपुर, ललितपुर र काभ्रेपलाञ्चोकमा पुष्टि भएको थियो। पशु सेवा विभागका अनुसार अधिकांश स्थानमा संक्रमण नियन्त्रणको चरणमा पुगेको छ तर प्रभावित फार्ममा पाँचदेखि ६ महिनासम्म पुनः कुखुरा राख्न नमिल्ने भएकाले उत्पादन चक्र अवरुद्ध भएको हो।