४२औं राष्ट्रिय ब्याडमिन्टन प्रतियोगिता: दिवस र शंकरको दोहोरो जित

कोसी प्रदेशका दिवस शंकर र गण्डकी प्रदेशका सुजन थापाले ४२औं राष्ट्रिय ब्याडमिन्टन प्रतियोगिताको पुरुष सिंगल्सतर्फ दोहोरो जित निकालेका छन्।

नेपाल ब्याडमिन्टन संघको आयोजनामा बुधबारदेखि सुरु भएको प्रतियोगितामा कोसीका दिवस र गण्डकीका सुजनले पुरुष सिंगल्सतर्फ समान दुई जित आत्मसात् गरेका हुन् । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सुजनले सुदूरपश्चिम प्रदेश र दिवसले लुम्बिनी प्रदेशका प्रतिद्वन्द्वीलाई नै हराउँदै दुई जित दर्ता गरे । सुजनले पहिलो खेलमा सुदूरपश्चिमका रियान्स चौधरीलाई २१–१२ र २१–१७ तथा दोस्रो खेलमा प्रदीप सोतीलाई २१–१६ र २१–१२ ले हराए । पराजित दुवै सुदूरपश्चिम प्रदेशका हुन् । दिवसले पनि लुम्बिनीका खेलाडीद्वय अनिश थापामगरलाई २१–७ र २१–९ तथा हिमान्स कुँवर मगरलाई २१–८ र २१–१३ को अन्तरले हराउँदै दोहोरो जित आत्मसात् गरे।