मुख्यसचिवको निर्णय ६ घण्टामै किन उल्टियो?

यस वर्ष लोकसेवा आयोगले निजामती सेवामा नयाँ भर्नाका लागि विज्ञापन आह्वान नगर्ने भनी मुख्यसचिव गोविन्दबहादुर कार्कीको अध्यक्षतामा बसेको सचिवस्तरीय बैठकले गरेको निर्णयलाई मन्त्रिपरिषद् तथा प्रधानमन्त्री कार्यालयले ६ घण्टामै सच्याएको छ। प्रधानमन्त्री कार्यालयले लोकसेवा आयोगका नियमित प्रक्रिया नरोकिने प्रस्ट पारेको छ। निर्णय नै सच्याउनुपर्ने स्थितिका कारण मुख्यसचिव कार्कीको पहिलो बैठक विवादमा परेको छ।

हरेक वर्ष लोकसेवा आयोगमा विभिन्न परीक्षामा चारदेखि पाँच लाख युवाले तयारी गरेका हुन्छन्। तीमध्ये करिब तीन हजार पाँच सय युवा निजामती सेवामा प्रवेश गरेका हुन्छन् तर आयोगले परीक्षा रोक्दा युवामा निराशा उत्पन्न हुने निश्चित छ। त्यसैले आयोगको भर्ना प्रक्रिया नियमित हुनुपर्छ भन्ने प्रधानमन्त्री कार्यालयको बुझाइ रहेको एक कर्मचारीले बताए। यस वर्ष संघका विभिन्न कार्यालयमा एक हजार पाँच सय देखि २ हजार दरबन्दी कटौती हुने सम्भावना रहेको भूमि व्यवस्था सहकारी, संघीय मामिला तथा सामान्य प्रशासन मन्त्रालयका एक कर्मचारी बताउँछन्। ‘त्यसैले यस वर्ष आयोगले भर्ना प्रक्रिया रोक्ने अवस्था छैन तर केही दरबन्दी कटौती हुने सम्भावना भने छ,’ ती कर्मचारीले भने।