कोलकाता-विराटनगर रेलमार्ग खुल्दा उत्पादन लागत घट्ने र प्रतिस्पर्धा बढ्ने आशा

विराटनगर- नेपाल–भारत पारवहन सम्झौताअन्तर्गत तेस्रो मुलुकबाट आयातित सामान बोकेको कार्गो रेल पहिलोपटक भारतीय बन्दरगाह कोलकाताबाट सिधै विराटनगर आइपुगेपछि पूर्वी नेपालका उद्योगी–व्यवसायी उत्साहित बनेका छन् । वर्षौंदेखिको माग पूरा भएको भन्दै उद्योगीहरूले यसलाई पूर्वी नेपालको औद्योगिक विकासका लागि ‘गेम चेन्जर’ र ‘माइलस्टोन’को संज्ञा दिएका छन् ।

गत शुक्रवार कोलकाताबाट छुटेको औद्योगिक कच्चा पदार्थ बोकेको रेल सोमवार विराटनगरस्थित कस्टम यार्डमा आइपुगेको हो । नियमित सेवाका रूपमा आएको पहिलो कार्गो रेलमा मोरङ–सुनसरी औद्योगिक करिडोरस्थित स्वस्तिक आयल इन्डस्ट्रिजका लागि तेस्रो मुलुकबाट आयात गरिएको कच्चा पदार्थ ल्याइएको थियो । यसअघि तेस्रो मुलुकबाट आउने सामान भारतको बथनाहासम्म मात्र रेलमार्फत ल्याइन्थ्यो । त्यसपछि ट्रकमार्फत विराटनगर ल्याउनुपर्ने बाध्यता थियो । अब भने रेल सिधै नेपालको भन्सार बिन्दुसम्म आइपुग्ने भएपछि ढुवानी प्रक्रिया छोटिने, लागत घट्ने र समय बचत हुने उद्योगीहरूको विश्वास छ ।