प्रदेशमा सत्ता फेरबदलको चक्र

शून्य सदस्य रहेको राष्ट्रिय स्वतन्त्र पार्टीले प्रदेशसभा खारेज गर्ने बहस चलाइरहँदा ठूला दल भनिएकाहरु सत्ता परिवर्तनको दाउमा छन् । नेपाली कांग्रेस, नेकपा एमाले र नेपाली कम्युनिस्ट पार्टी (नेकपा)को खिचलोका कारण प्रदेशसभा राजनीतिक बन्दी बनेको छ । तीन दल सत्तामा रुमलिएका कारण सातवटै प्रदेशमा सत्ता फेरबदल हुने सम्भावना छ । हुन त तीन दल मिलेर प्रदेश सरकार बनाउने हल्ला नचलेको होइन तर नेपाली कांग्रेसका सभापति गगन थापाले प्रतिपक्षविहीन सरकारको औचित्य नभएको भन्दै दुई दलको सरकार बनाउनुपर्नेमा जोड दिएका छन् ।

नेपाली कांग्रेसले तीन दलको सहकार्यमा सरकार बनाउने विषय इन्कार गरेपछि नेकपा एमाले र नेकपा सरकार बनाउने कसरतमा लागेका छन् । एमालेका महासचिव शंकर पोखरेल र नेकपाका अध्यक्ष पुष्पकमल दाहाललगायतका दुई दलका संयन्त्र सातै प्रदेशमा लागिरहेका छन् । दुई दलको सहमति भए केही प्रदेशमा सरकार परिवर्तन हुन सक्छ । नेपाली कांग्रेसले पनि आफ्नै तहबाट नेकपासँग छलफल जारी राखेको छ । राजनीतिक खिचातानीले बिगारेको प्रदेश सरकार कहिल्यै पनि स्थिर हुन सकेन । पार्टी अध्यक्षलाई चित्त नबुझे तत्काल सरकार परिवर्तन गर्नुपर्छ भन्ने लहडको कारण समस्या बनेको छ । तीन दलको अहंताले जेनजी आन्दोलन भएको थियो । आन्दोलनपछि संघमा सत्ताविहीन भएको दललाई अझै पनि सत्तामोह छ । त्यसको फलस्वरुप प्रदेश सरकार परिवर्तनको खेलमा लागेका छन् ।