पञ्जाबकाे परीक्षामा पनि धाँधलीः केजरीवालको मौनता किन ?

काठमाडाैं । भारतमा ‘नीट’ परीक्षाको प्रश्नपत्र बाहिरिएको विषयलाई लिएर आम आदमी पार्टी (आप)ले दिल्लीमा विरोध प्रदर्शन गरिरहेका बेला भारतीय जनता पार्टी (भाजपा)ले पञ्जाबमा भएको अर्को ठूलो भर्ती परीक्षा धाँधलीलाई लिएर ‘आप’ का शीर्ष नेता अरविन्द केजरीवालको मौनतामाथि प्रश्न उठाएको छ।

४५४ फर्मासिस्ट (फार्मेसी अफिसर) पदका लागि बाबा फरिद युनिभर्सिटी अफ हेल्थ साइन्सेजद्वारा आयोजित लिखित परीक्षामा याे धाँधली भएकाे आराेप छ । फरिदकोट, कोटकापुरा र फिरोजपुरका १८ परीक्षा केन्द्रमा करिब ७,००० परीक्षार्थी सहभागी भएको यस परीक्षामा एउटा गिरोहले परीक्षार्थीहरूबाट ३.५ लाखदेखि १३ लाख भारतीय रुपैयाँसम्म असुल गरी परीक्षा भवनभित्रै ‘लाइभ’ उत्तर पठाउने व्यवस्था मिलाएको खुलासा भएको छ।