एनसेल स्वामित्व विवाद अन्त्यतिर, शेयर हस्तान्तरण कानूनअनुसार गर्न प्राधिकरणलाई सर्वोच्चको आदेश 

काठमाडौँ । एनसेल आजियाटाको स्वामित्व हस्तान्तरण सम्बन्धी लामो समयदेखि विवादित विषय टुंगिने बाटोमा अगाडि बढेको छ । सर्वोच्च अदालतले एनसेल आजियाटाको स्वामित्व हस्तान्तरणसम्बन्धी लामो समयदेखि विवादित विषयमा महत्वपूर्ण फैसला गर्दै शेयर हस्तान्तरणको प्रक्रिया प्रचलित कानूनअनुसार टुंग्याउन नेपाल दूरसञ्चार प्राधिकरणलाई निर्देशन दिएसँगै समाधानतिर अगाडि बढेको हो ।

करिब अढाई वर्षदेखि रोकिएको एनसेलको स्वामित्व हस्तान्तरण प्रक्रिया नियामकीय निर्णयमार्फत निष्कर्षमा पुग्ने बाटो खुलेको हो । न्यायाधीश सपना प्रधान मल्ल र टेकप्रसाद ढुङ्गानाको संयुक्त इजलासले अमरेशकुमार सिंहले दायर गरेको रिटमा शेयर खरिद–बिक्री सम्झौता स्वतः बदर गर्नुपर्ने माग स्वीकार नगरे पनि प्राधिकरणले दूरसञ्चार ऐन, २०५३, दूरसञ्चार नियमावली, २०५४, नेपाल दूरसञ्चार प्राधिकरण (अनुमतिपत्र प्राप्त व्यक्तिको शेयर खरिद–बिक्री) विनियमावली, २०७६ तथा अनुमतिपत्रका शर्तअनुसार आवश्यक नियामकीय प्रक्रिया पूरा गरी निर्णय गर्नुपर्ने स्पष्ट गरेको हो।