अमेरिका वार्ताका लागि तयार, तर मानिरहेको छैन इरान

एजेन्सी। अमेरिकी विदेशमन्त्री मार्को रुबियोले बुधबार संयुक्त राज्य अमेरिका अझै पनि इरान संकटको कूटनीतिक समाधानका लागि वार्ता गर्न तयार रहेको, तर तेहरान त्यसमा गम्भिर नभएको बताएका छन्। यसैबीच विस्तार हुँदै गएको द्वन्द्वले विश्वका दुई महत्त्वपूर्ण ऊर्जा आपूर्ति समुद्री मार्गमा अवरोध उत्पन्न गरेको छ।

दक्षिणपूर्वी एसियाली राष्ट्रहरूको विदेशमन्त्रीहरूको बैठकमा बोल्दै रुबियोले यी टिप्पणी गरेका हुन्। उनले बोलेको एक दिनअघि साउदी अरबबाट एसियातर्फ कच्चा तेल बोकेका तीनवटा ट्यांकरले लाल सागरमा आफ्नो यात्रा बीचमै रोकेर फर्केका थिए। यो निर्णय यमनका इरान समर्थित हुथी विद्रोहीहरूको धम्कीपछि लिइएको मानिएको छ।