जम्मू–कश्मीरमा आतंककारी हमला, गस्तीमा रहेका प्रहरीको गोली हानी हत्या

भारत : जम्मू–कश्मीरको अनन्तनागमा भएको आतंककारी आक्रमणमा ड्युटीमा रहेका एक प्रहरी हवल्दार (हेड कन्स्टेबल) को मृत्यु भएको छ । गस्तीमा रहेको प्रहरी टोलीमाथि अचानक गोली प्रहार हुँदा उनी गम्भीर घाइते भएका थिए ।

सुरक्षा स्रोतहरूका अनुसार, एउटा सवारीसाधनमा आएका आतंककारीहरूले गस्ती गरिरहेको प्रहरी टोलीलाई लक्षित गर्दै अन्धाधुन्ध गोली चलाएका थिए । अमरनाथ यात्राको सुरक्षा ड्युटीमा खटिएका हवल्दार आशिक हुसेन हमलामा घाइते भएका थिए । उनलाई तत्काल उपचारका लागि अनन्तनाग सरकारी मेडिकल कलेज अस्पताल लगिए पनि चिकित्सकहरूले मृत घोषणा गरेका हुन् । यस हमलाको जिम्मेवारी लश्कर–ए–तैयबासँग सम्बन्धित संगठन ‘द रेजिस्टेन्स फ्रन्ट (टीआरएफ) ले सामाजिक सञ्जालमार्फत लिएको जनाइएको छ ।