पोखरा अन्तर्राष्ट्रिय विमानस्थल: नियमित अन्तर्राष्ट्रिय उडानलाई आकर्षित गर्न छुट

मन्त्रीपरिषद्को बुधबार बसेको बैठकले पोखरा र भैरहवास्थित गौतम बुद्ध अन्तर्राष्ट्रिय विमानस्थललाई चलायमान बनाउनका लागि अन्तर्राष्ट्रिय नियमित हवाई उडानलाई पार्किङ, ल्यान्डिङ तथा नेभिगेसनमा सतप्रतिशत र ग्राउन्ड ह्यान्डलिङ शुल्कमा ५० प्रतिशत छुट दिने निर्णय गर्यो।

सरकारको यो निर्णयसँगै २०८५ भदौ मसान्तसम्मको लागि पोखरा र गौतम बुद्ध अन्तर्राष्ट्रिय विमानस्थलबाट हुने अन्तर्राष्ट्रिय नियमित हवाई उडानमा पार्किङ, ल्यान्डिङ तथा नेभिगेसन शुल्क पूर्ण रुपमा र ग्राउन्ड ह्यान्डलिङ शुल्कमा ५० प्रतिशत छुट हुनेछ। अघिल्ला सरकारले दिएको छुट आगामि भदौ मसान्तमा सकिन लागेको थियो। तर, अन्तर्राष्ट्रिय उडानको तयारीमा रहेका हवाई कम्पनिले यो छुटलाई कम्तिमा दुईवर्षका लागि थपिदिन आग्रह गर्दै आएका थिए।