हदबन्दीभन्दा बढी जग्गाको दुरुपयोग खोज्दै सरकार, देशभरका मालपोत कार्यालयलाई फिल्ड अनुगमनको निर्देशन

काठमाडौं । सरकारले हदबन्दीभन्दा बढी जग्गा खरिद वा राख्न स्वीकृति लिएका उद्योग, कम्पनी तथा संस्थाले स्वीकृत उद्देश्यअनुसार जग्गा उपयोग गरे–नगरेको खोजी थालेको छ । त्यसका लागि भूमि व्यवस्थापन तथा अभिलेख विभागले देशभरका भूमि प्रशासन (मालपोत) कार्यालयलाई फिल्डमै पुगेर अनुगमन तथा निरीक्षण गरी प्रतिवेदन बुझाउन निर्देशन दिएको छ ।

विभागका महानिर्देशक योगेन्द्रप्रसाद दुलालले साउन ६ गते जारी गरेको परिपत्रमार्फत हदबन्दीभन्दा बढी जग्गा लिएका कम्पनी, उद्योग, प्रतिष्ठान तथा संघसंस्थाले स्वीकृत उद्देश्यअनुसार जग्गा प्रयोग गरे–नगरेको यथार्थ विवरण संकलन गर्न निर्देशन दिएका हुन् ।