बर्डफ्लु प्रभावित १ सय ४ फार्मले पाए ५० करोड क्षतिपूर्ति

काठमाडौं । पछिल्लो चार महिनामा बर्डफ्लु संक्रमणबाट १ सय ६२ वटा कुखुरा तथा पन्छी फार्म प्रभावित भएका छन् । त्यसमध्ये १ सय ४ प्रभावित किसान तथा फार्मको बैंक खातामा ५० करोड ७१ लाख १५ हजार ७ सय ४ रुपैयाँ २५ पैसा क्षतिपूर्ति वितरण गरिएको पशु सेवा विभागले बताएको छ ।

सरकारले आर्थिक वर्षको अन्त्यमा कृषि वन तथा पर्यावरण मन्त्रालयबाट क्षतिपूर्तिका लागि ५० करोड रुपैयाँ विनियोजन गरेको र उक्त रकम क्षतिपूर्तिबापत किसानलाई दिइसकिएको पशु सेवा विभागका वरिष्ठ पशु चिकित्सक मुकुल उपाध्यायले जनाए । चालु आर्थिक वर्षको पहिलो चौमासिकका लागि भने विभागसँग २ करोड रुपैयाँ बजेट रहेको उनको भनाइ छ ।