लोकसेवाको पदपूर्ति रोक्ने निर्णयविरुद्ध प्रदर्शन

काठमाडौं : सरकारले स्थायी कर्मचारी भर्ना प्रक्रिया स्थगन गर्ने निर्णय गरेपछि लोकसेवा आयोगको तयारी गरिरहेका परीक्षार्थीहरू आन्दोलित भएका छन्। मुख्य सचिवस्तरीय बैठकले गरेको निर्णय तत्काल फिर्ता लिन माग गर्दै बुधबार बिहानैदेखि परीक्षार्थीहरूले काठमाडौंको माइतीघर मण्डलामा विरोध प्रदर्शन गरेका हुन्।

प्रदर्शनमा सहभागी विद्यार्थीले गत साउन ५ गते बसेको मुख्य सचिवस्तरीय बैठकको बुँदा नम्बर ११ को निर्णय तत्काल खारेज हुनुपर्ने माग गरेका छन्। उक्त बुँदामा ‘नयाँ संगठन तथा व्यवस्थापन सर्वेक्षण (ओएन्डएम) अनुसार नेपाल सरकारका विभिन्न दरबन्दीहरू घट्दा फाजिलमा पर्ने कर्मचारी व्यवस्थापन गर्नुपर्ने भएकाले चालु आर्थिक वर्ष प्रधानमन्त्री तथा मन्त्रिपरिषद्को कार्यालयको स्वीकृतिबिना नेपाल सरकारका कुनै पनि कार्यालयले स्थायी पदपूर्ति नगर्ने र स्थायी पदपूर्तिका लागि लोकसेवा आयोगमा माग नगर्ने/नगराउने’ उल्लेख छ।