सरकारसमक्ष पाँचबुँदे माग राख्दै डा. गोविन्द केसीले धनगढीमा सुरु गरे २४औँ सत्याग्रह

धनगढी । वरिष्ठ चिकित्सक तथा चिकित्सा शिक्षा सुधार अभियन्ता प्रा. डा. गोविन्द केसी २४औँ सत्याग्रहका लागि कैलालीको धनगढी पुगेका छन् । उनी धनगढी उपमहानगरपालिका–१, एलएन चोकस्थित श्रीकृष्ण मन्दिर धर्मशालाको कोठा नम्बर २११ मा बसेर बिहीबारदेखि सरकारसमक्ष पाँचबुँदे माग राख्दै अनशन सुरु गर्ने भएका हुन् ।

दार्चुलाबाट जारी गरिएको प्रेस विज्ञप्तिमा डा. केसीले सरकारले आफूले उठाएका मागप्रति संवेदनशीलता नदेखाएको तथा साउन ५ गतेसम्म दिएको समयसीमासमेत बेवास्ता गरेपछि पुनः सत्याग्रहमा बस्न बाध्य भएको बताएका छन् । उनले आन्दोलनबाट उत्पन्न हुने कुनै पनि परिस्थितिको जिम्मेवारी वर्तमान सरकारले लिनुपर्ने चेतावनी दिएका छन् ।