अप्ठेरोमा कांग्रेस

नेपाली कांग्रेसभित्रको आन्तरिक विवाद बिस्तारै आरोपप्रत्यारोपमा बदलिएको छ। भदौ २३ र २४ गतेको जेनजी विद्रोहसँगै मौलाउँदै गएको विवाद पार्टीका संस्थापक नेता बिपी कोइरालाको ४४औं स्मृति दिवससम्म आइपुग्दा विग्रह उन्मुख बन्न पुगेको हो। पुसमा भएको विशेष महाधिवेशनलाई निर्वाचन आयोग हुँदै सर्वोच्च अदालतले पनि वैधता दिएसँगै कांग्रेसभित्रको विवाद तीव्र बन्न पुगेको थियो। विवाद समाधान गर्नेभन्दा एकले अर्कालाई गलाउने र थकाउने रणनीतिमा कांग्रेसका नेताहरूले समय गुजार्दै आएका थिए।

४४औं स्मृति दिवसका अवसरमा बुधबार संस्थापन र विशेष महाधिवेशनमा सहभागी नभएको इतर पक्षले अलगअलग कार्यक्रम गरेका छन्। त्यति मात्र होइन, सहमतिका लागि सभापति गगनकुमार थापा तयार नभए साउन २९ गते राष्ट्रिय भेला आयोजना गर्ने घोषणा गरेका छन्। यसले कांग्रेसभित्रको विवाद अब निर्णायक मोडमा पुगेको छ। संस्थापन इतरले अघि सार्दै आएको सदस्यता अध्यावधिक रोक्ने र १४औं महाधिवेशनपछिका केन्द्रीय सदस्यहरूलाई समायोजन गर्नुपर्ने प्रस्तावलाई संस्थापन पक्षले अस्वीकार गर्दै आएका छन्। त्यसबाहेकका अन्य विषयलाई सम्बोधन गर्न सकिने संस्थापन पक्षले बताउँदै आएको छ। तर इतर पक्षले केन्द्रीय समिति समायोजनलाई आफ्नो बटमलाइन बनाएको छ।