शैक्षिक परामर्श क्षेत्रका समस्या र नीतिगत सुधारबारे आज मन्त्रालयमा छलफल हुँदै

काठमाडौँ। शिक्षा तथा खेलकुद मन्त्रालयले शैक्षिक परामर्श (एजुकेसन कन्सल्टेन्सी) क्षेत्रका समस्या, चुनौती र नीतिगत सुधारका विषयमा आज सरोकारवालाहरूसँग विस्तृत छलफल गर्ने भएको छ। सरकारका प्रवक्ता तथा शिक्षामन्त्री सस्मित पोखरेलको प्रमुख उपस्थितिमा मन्त्रालयमा हुने यस छलफलमा शैक्षिक परामर्श क्षेत्रसँग आबद्ध विभिन्न सङ्घ–संस्थाका पदाधिकारी तथा प्रतिनिधिहरूको सहभागिता रहनेछ।

कन्सल्टेन्सी व्यवसायको वर्तमान अवस्था, यस क्षेत्रले भोगिरहेका समस्या तथा चुनौती, गुणस्तरीय शैक्षिक परामर्श सेवाको प्रवर्द्धन, नीतिगत सुधार र प्रभावकारी नियामकीय व्यवस्थाबारे छलफल गरी क्षेत्रलाई थप व्यवस्थित तथा पारदर्शी बनाउने उद्देश्यले यो बैठक डाकिएको हो। यस छलफलमा नेपाल शैक्षिक परामर्श सङ्घ (इक्यान), स्वतन्त्र शैक्षिक परामर्श सङ्घ (फेकन), सक्रिय शैक्षिक परामर्श सङ्घ (एइक्यान), शैक्षिक परामर्श व्यवसायी संस्था (एरी), जापानीज भाषा स्कुल सङ्घ (जालसान), नेपलिज एसोसिएसन अफ अस्ट्रेलियन एजुकेशन रिप्रिजेन्टेटिभ (नायर), नेशनल एजुकेशन कन्सल्टेन्सी एसोसिएसन (नेका) लगायत एक्यान, नेवा र नेक्साका प्रतिनिधिहरूको सहभागिता रहनेछ।