प्रधानमन्त्रीको ढाडस र सेबोनको बाचाले बढेको सेयर बजार, दिगो सुधार कि क्षणिक उत्साह ?

नयाँ आर्थिक वर्ष सुरु हुनु भन्दा ३ दिन पहिले लगानीकर्ताहरु नेपाल धितोपत्र बोर्ड (सेबोन) मा ताला लगाउन गए । पुँजी बजारका लागि गर्नु पर्ने काम नगर्ने बोर्ड खुला राख्नुको कुनै औचित्य नभएको भन्दै लगानीकर्ताहरु ताला लगाउन भन्दै असार ३० गते विहान ९ बजे सेबोन पुगे । उनीहरुले ताला लगाउने भन्ने विषयमा अग्रिम जानकारी पाएको बोर्ड नेतृत्वल प्रहरीको सहयोग माग्यो । प्रहरीको उपस्थितिले लगानीकर्ताहरुले बोर्डमा ताला लगाउन सकेनन् । करिब ३ घण्टा जति लगानीकर्ताहरु बोर्डको गेट बाहिर मिडियामा आफ्नो कुराहरु राखिरहे ।

त्यसै बीचमा लगानीकर्ताको नेतृत्व गरेका तिलक कोइरालाई सेबोनका अध्यक्ष डा. गोपाल भट्टले फोन गरेर लगानीकर्ताको माग पुरा गर्ने आश्वासन दिए । अध्यक्ष भट्टले कोइरालाई भने, ‘आन्दोलन रोकेर लगानीकर्ताहरुलाई फिर्ता जान भन्नु होस् । तपाइहरुको माग पुरा गर्न बोर्ड तयार छ ।’ अध्यक्षको आश्वासन पछि कोइरालाले बोर्ड परिषर खुमलटार पुगेका लगानीकर्ताहरुलाई फिर्ता जानका लागि आग्रह गरे । सबै लगानी कर्ता त्यहाँबाट फर्किए । बोर्डका अध्यक्षले अर्थमन्त्रीसँग छलफल गरेर पुँजी बजार सुधारको कार्ययोजना सार्वजनिक गर्ने बाचा गरे । उनले गरेको बाचा अनुसार सोही दिन साँझ पुँजी बजार सुधार कार्ययोजना र बोर्डको नीति तथा कार्यक्रम सार्वजनिक भयो ।