मदन भण्डारी लोकमार्गलाई सहायक मागर्न मान्ने: ३० मिटर सीमा कायम गर्ने त्रियुगा नगरको निर्णय

मदन भण्डारी लोकमार्ग ६२ मिटर चौडा बनाइने चर्चा पछि घरजग्गा कारोबार प्रभावित बनेको अवस्थामा त्रियुगा नगरपालिकाले नगरवासीलाई राहत दिने निर्णय गरेको छ। नगरप्रमुख बसन्त बस्नेतले बुधबार सार्वजनिक सूचना जारी गर्दै नगर क्षेत्रभित्र पर्ने मदन भण्डारी लोकमार्गलाई हालका लागि सहायक मार्ग मानी केन्द्ररेखाबाट दायाँ–बायाँ १५–१५ मिटर गरी ३० मिटर सीमा कायम गर्ने निर्णय भएको जानकारी दिएका हुन्।

केही दिनअघि बसेको ६२औँ नगरकार्यपालिका बैठकले साविक धरान–चतरा–गाईघाट–कटारी–सिन्धुली–हेटौंडा सडकखण्डलाई सहायक मार्गका रूपमा कायम राख्ने निर्णय गरेको सूचनामा उल्लेख छ। नगरपालिकाले ६२ मिटरको मापदण्ड लागू भए गाईघाटसहित विभिन्न बजारका हजारौँ घरटहरा प्रभावित हुने भएकाले हाललाई पुरानै मापदण्डलाई निरन्तरता दिइएको जनाएको छ।