इलामको यातायात ठप्प, ‘विपद् संकटग्रस्त’ घोषणा गर्न माग

इलामको यातायात सेवा ज्यादै कष्टप्रद भएको महिनादिनसम्म समाधान निस्किन सकेको छैन । सदरमुकामसहित पाँचथर र ताप्लेजुङसमेत आउ–जाउ गर्ने मुख्य सडकका रूपमा रहेको मेची राजमार्ग महिना दिनयता बन्द छ ।

इलाम नगरपालिका ९, राजदुवालीमा पहिरो झरेर र धस्सिएर करिब आधा किलोमिटर मेची राजमार्ग क्षतिग्रस्त छ । यहाँबाट घाम लाग्दा जसोतसो गाडी चल्नेगरेपनि पानी आउनेबित्तिकै बन्द हुनेगरेको थियो । तर, करिब २ सातायता यहाँबाट कुनैपनि सवारीका साधन चल्न नसक्दा खाद्यान्नसहित उपभोग्य सामग्री ढुवानी ज्यादै सकसपूर्ण हुनथालेको छ । वैकल्पिक सडकहरूमा समेत बर्खाको भेलबाढीले सवारी साधन सहज रूपमा चल्ने अवस्था नहुँदा इलाम सदरमुकाम ‘टापु’झैं बनेको छ ।