सरकार बनाउनका लागि केन्द्रको निर्णय कुर्दै खगराज भट्ट

काठमाडौँ । नेपाली कम्युनिस्ट पार्टी(नेकपा)ले सुदूरपश्चिम प्रदेशमा सत्ता समीकरण बनाउने विषयमा केन्द्रको निर्णय कुरेर बसेको छ। नेपाली कांग्रेस र नेकपा एमालेबिच सत्ता गठबन्धन टुटेपछि प्रमुख प्रतिपक्ष दल नेपाली कम्युनिस्ट पार्टीले आफ्नै नेतृत्वका सरकार गठन गर्न पाँच सदस्यीय वार्ता टोली गठन गरेको थियो।

वार्ता टोलीमा संसदीय दलका नेता खगराज भट्टसहित प्रदेशसभा सदस्यहरू प्रकाश रावल, मानबहादुर धामी, खुशीराम चौधरी र रमेश धामी रहेका छन् । वार्ता टोलीले कांग्रेस र एमाले दुवै दलसँग छलफल गरेको दलका नेता तथा संयोजक खगराज भट्टले जानकारी दिए । तर सर्वदलीय सरकार बनाउने कि दुइ पक्ष मिलेर सरकार बनाउने भन्नेमा केन्द्रबाट कुनै निर्देशन नआएको भट्टले जानकारी दिए।