वाम एकतामा ढिलाइ गरे ठूलो गल्ती हुनेछ : दाहाल

काठमाडौँ- नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ ले वामपन्थी तथा देशभक्त शक्तिबीच कार्यगत एकतामा ढिलाइ गर्नु ठूलो राजनीतिक गल्ती हुने बताएका छन्।

उनले तत्काल पार्टी एकता नभए पनि राष्ट्रिय स्वाधीनता, संविधानको रक्षा र बाह्य हस्तक्षेपविरुद्ध सहकार्य सुरु गर्नुपर्नेमा जोड दिए। नेपालको कम्युनिस्ट आन्दोलन र जननेता मदन भण्डारी विषयक विचार गोष्ठीलाई सम्बोधन गर्दै प्रचण्डले विचार मिल्ने शक्तिहरूबीच सहकार्य गर्न अनावश्यक ढिलाइ गर्न नहुने बताए। ‘आजै सम्भव छ भने आजै, भोलि सम्भव छ भने भोलि नै कार्यगत एकता गरौं भन्ने मेरो भनाइ हो, तत्काल पार्टी एकता गरौं भनेको होइन,’ उनले भने।