‘डा. केसीसँग छु’ भन्ने शिक्षामन्त्रीकै कार्यशैलीविरूद्ध गाेविन्द केसीकाे २४औँ सत्याग्रह

काठमाडौँ । आठ वर्षअघि ‘डा. गोविन्द केसी जोसँग लड्छन्, म सधैँ उहाँकै साथमा हुन्छु’ भन्दै सामाजिक सञ्जालमार्फत ऐक्यबद्धता जनाएका वर्तमान शिक्षा, विज्ञान तथा खेलकुदमन्त्री सस्मित पोखरेल अहिले डा. केसीकै आन्दोलनको मुख्य निशानामा परेका छन्। यससँगै मन्त्री पोखरेलको विगतको सार्वजनिक प्रतिबद्धता र वर्तमान कार्यशैलीबिचको विरोधाभासबारे बहस सुरु भएको छ।

डा. गोविन्द केसीले बिहीबारदेखि धनगढीमा आफ्नो २४औँ सत्याग्रह (अनसन) सुरु गरेका छन्। यसपटकका उनका प्रमुख मागहरू शिक्षा मन्त्रालय र चिकित्सा शिक्षा आयोगसँग प्रत्यक्ष रूपमा सम्बन्धित छन्।